Os Moto G5 e G5 Plus estrean edicións especiais

Os Moto G5 e Moto G5 Plus foron os primeiros smartphones da familia Motorola en ter carcasa de aluminio, destacando o modelo Plus pola súa cámara con apertura f/1.7 que a situaba entre o mellor da súa gama, e agora estes terminais estrean edición especial que incorporan novas prestacións e melloran as súas especificacións, aínda que os cambios introducidos afectan ao prezo dos dispositivos, que vese lixeiramente incrementado.

O Moto G^5S mellora en batería, pantalla e a cámara frontal

O Moto G^5S está equipado cun procesador Qualcomm Snapdragon 430, a súa pantalla Full HD medra até as 5,2 polgadas, prescinde do modelo con 2 GB de RAM e véndese xa de saída con 3GB de RAM, o seu almacenamento interno pasa de 16 a 32 GB (ampliable mediante tarxetas microSD de até 128 GB), a súa cámara traseira pasa de 13 a 16 Mpíxeles, a cámara frontal mantén os 5 Mpíxeles pero mellora a súa apertura (agora f/2.0) e incorpora Flash LED, a súa batería medra até os 3.000 mAh con TurboPower que permite 5 horas de enerxía con só 15 minutos de carga e, en consecuencia, o seu peso increméntase lixeiramente até os 157 gramos. De serie chega con Android 7.1 e o seu deseño externo é lixeiramente diferente ao do seu predecesor, polo que podemos entender que a semellanza no nome busca principalmente herdar a sona dun modelo de éxito. O seu prezo partirá dos 249 euros.

As cámaras dobres non son exclusivas da gama alta

Os cambios no Moto G^5S Plus son menores en número, pero maiores en impacto, pois non só a súa pantalla Full HD pasa de 5,2 a 5,5 polgadas e a cámara frontal mellora a súa apertura e resolución (agora conta cun sensor de 8 Mpíxeles con apertura f/2.0 e flash LED), senón especialmente por substituír a moi destacada cámara frontal de 12 Mpíxeles con apertura f/1.7 por unha cámara dual de 13 Mpíxeles con apertura f/2.0, o que xogar coa profundidade de campo para conseguir imaxes cun acabado máis profesional. Desta volta sorprende que as funcións da dobre cámara estean dispoñibles a posteriori, ou sexa, que podemos facer o enfoque selectivo despois de disparar a fotografía e incluso pode eliminarse o fondo dunha imaxes e substituílo por unha imaxe da biblioteca de Google Fotos. Este modelo superior tamén conta con NFC e Android 7.1, e o seu incremento de tamaño afectou tamén ao seu peso (agora de 168 gramos). O seu prezo de venda partirá dos 299 euros.