Situm crea Moretrack, unha tecnoloxía innovadora para xestionar os servizos de vixilancia por medio da xeolocalización e IA

A empresa Situm, con base en Santiago de Compostela, presentou este xoves por vídeo-conferencia unha tecnoloxía que pretende mellorar a seguridade e a vixilancia a través da xeocalización. Víctor Álvarez, director executivo (CEO) da empresa, realizou unha presentación virtual de Moretrack a través de Zoom para resolver as dúbidas que puidera haber sobre o proxecto.
A iniciativa está subvencionada pola Axencia Galega de Innovación (GAIN) e co-financiada polo Fondo Europeo de Desenvolvemento Rexional (FEDER) dentro do programa FEDER Galicia 2014 – 2020.
A tecnoloxía Moretrack permite xestionar os servizos de vixilancia, ademais de optimizar procesos internos tanto nos interiores como exteriores. Posibilita o control en tempo real dos gardas de seguridade e inclúe funcionalidades avanzadas de Intelixencia Artificial (IA).
A iniciativa engloba o desenvolvemento e a saída ó mercado do mesmo baixo o nome comercial Situm MRM. Segundo a empresa, o proxecto fornecerá de capacidades para detectar futuras amezas, automatizar a planificación da seguridade e axustar a resposta das ameazas identificadas.