Sony estrea un SDK preliminar dos seus lentes de realidade aumentada

Google non é a única compañía importante que está a desenvolver tecnoloxía de lentes, e a proposta de Sony, as SmartEyeglass, preséntanse como unha proposta bastante diferente, por adoptar a forma duns lentes completos nos que se sobreimprime información como texto, símbolos e imaxes a xeito de ferramenta de realidade aumentada, obténdose a información dun smartphone con Android 4.1 ou superior (para certas prestacións precisa de Android 4.3 como mínimo).
As Sony SmartEyeglass integran un sensor de imaxe CMOS, acelerómetro, xiroscopio, compás dixital, sensor de brillo e micrófono, proxecta imaxes monocromo para conseguir un consumo reducido (contando tamén cun potente brillo para facilitar que poida empregarse en exteriores) e os seus usos poderían ser moi diversos, como facer de navegador durante os nosos paseos, axudante de cociña (detallando unha receita sen que deixemos de ter as mans libres ou incluso obtendo información adicional mentres vemos un encontro deportivo.
Pero o potencial deste tipo de tecnoloxía dependerá máis dos desenvolvedores de software que do propio hardware que a sostén, e para iso Sony vén de lanzar hoxe mesmo un SDK prelimitar para as súas SmartEyeglass, que permitirá que comecen a facerse realidade as ideas que poidan querer aproveitar esta tecnoloxía.
Estes lentes binoculares teñen unha resolución de só 419 x 138 píxeles en monocromo (verde) con 8 bits de profundidade de cor, un brillo de 1.000 cd/m², cámara capaz de tomar fotografías de 3 Mpíxeles e gravar vídeo VGA, altofalante no seu controlador, conectividade Wi-Fi N e Bluetooth 3.0, e un peso de 77 gramos (os lentes) e 44 gramos (o controlador).

Vídeo de presentación do novo SDK para SmartEyeglass