Sony presenta novas cámaras 3D no CES

Sony presentou no CES de Las Vegas unha cámara Handycam capaz de gravar vídeo en 3D

A emerxencia das 3D no ámbito doméstico levou a Sony a presentar no CES de Las Vegas unha serie de cámaras dixitais (tanto fotográficas como de vídeo) orientadas á captación de imaxes estereoscópicas que van dende a incorporación dun modo 3D para as cámaras Cyber-shot ata unha potente videocámara Handycam que custará uns 1.500 dólares e que non só grava en 3D, senón que tamén conta cunha cativa pantalla autoestereoscópica (que permite ver imaxes 3D sen lentes). A medio camiño non podemos deixar de destacar a cámara Bloggie 3D (tamén coñecida coma MHS-F33) que presenta un tamaño compacto e un peso lixeiro, o que non impide que integre 2 sensores de imaxe Exmor CMOS para captar imaxes estereoscópicas que almacenar na súa memoria interna de 8 Gb. Tamén conta cun conector USB retráctil e cun porto HDMI.
A Bloggie 3D é capaz de captar vídeo 2D en Full HD e fotografías de 5 Mpíxeles, aínda que moitos destacarán principalmente os seus modos 3D, que poden aproveitarse sen o uso de lentes grazas á pantalla integrada na cámara que porase á venda en abril en España a un prezo estimado de 270 euros.