Star Wars terá un novo xogo multiusuario en liña

mércores, 22 de outubro do 2008 Marcus Fernández

JPEG - 67.5 KB
Os combates con espadas de luz non faltarán no novo xogo

LucasArts e BioWare confirmaron os rumores dos últimos meses ao anunciar oficialmente o desenvolvemento do xogo masivo en liña Star Wars: The Old Republic, que sairía inicialmente para PC, aínda que non se descartan posibles adaptacións para consolas de videoxogos, plataformas nas que tradicionalmente non trunfan este tipo de xogos.
O xogo pretenderá crear unha ambientación xa coñecida polos seguidores de xogos coma Knights of the Old Republic, situando a acción uns 3.600 anos antes das películas de George Lucas, permitindo tomar parte do bando Jedi ou Sith, aínda que tamén se poderán encarnar outros roles típicos do universo de Star Wars.
O director xeral de BioWare, Ray Muzyka, declarou durante a presentación do novo xogo que «tradicionalmente, os xogos multixogador en liña teñen 3 piares básicos (combate, exploración e evolución dos personaxes)» e que esta produción engadiría «un novo cuarto piar á ecuación (a historia)». Lembremos que este último factor tamén foi decisivo para o éxito de El Poder de la Fuerza, xogo que decepcionou á crítica pero convenceu ao público ao presentarlle unha trama na que poder somerxerse.
Polo momento só podemos ver algunha captura do xogo, algo da arte conceptual e declaracións dos seus responsables, tendo que agardar para coñecer detalles coma a data de lanzamento do xogo ou o sistema de xogo.

JPEG - 61.4 KB
Ao poder elixir o usuario entre Sith e Jedi tamén se abre a porta ao uso do Lado Escuro da Forza



Ray Muzyka e Greg Zeschuk explican a importancia do novo xogo nun vídeo para Gamespot

PUBLICIDADE