Steam permitirá o préstamo de xogos

A plataforma de descarga de xogos para PC máis popular na actualidade, Steam, está a evolucionar, e para estreitar a fenda que separa ao formato físico do dixital, vén de anunciar unha nova funcionalidade que a xeito de broma comentan que roubaron da Xbox One (aínda que finalmente Microsoft recuou a este respecto), que consistiría en permitir o préstamo de xogos da nosa biblioteca de xogos comprados a amigos e familiares.
En breve vai iniciar a súa fase de probas o Préstamo Familiar de Steam, que permitirá autorizar un ordenador compartido no que poderán identificarse distintas contas de Steam, de xeito que varios usuarios poderán xogar aos mesmos xogos dende cadansúa conta, rexistrando os seus logros e gardando as súas partidas de xeito independente.
O servizo tamén permitirá que cando vexamos que un membro da familia (ou amigo próximo) teña un xogo que queiramos probar, poidamos pedirlle que autorice o noso ordenador para poder descargalo e xogar sen ter que mercalo, aínda que, como acontece cos xogos en formato físico, só poderá xogar un usuario de cada vez, tendo sempre prioridade o comprador orixinal do título.
O Préstamo Familiar de Steam poderá activarse nun máximo de 10 dispositivos ao mesmo tempo, poderán compartirse as bibliotecas de xogos na súa totalidade (aínda que loxicamente os xogos que precisen dalgunha subscrición adicional non funcionarían para usuarios que non a tivesen contratada) e cando o dono dun xogo queira gozar dun título ao que estea xogando alguén a quen llo prestou, poderá facelo sen problema, recibindo o outro usuarios unha alerta que convidarao a mercar o xogo ou deixar de xogar tras uns minutos.