Unha vintena de investigadores participarán na edición de Pint of Science de Vigo e Ourense

O Festival Internacional de Divulgación Científica Pint of Science regresa a Ourense e Vigo, así como tamén a 67 cidades do ámbito estatal e 500 do mundo. Será a novena vez que esta iniciativa se celebre en España, propoñendo bares, pubs e cafeterías como punto de encontro para o debate e a divulgación de científicas/os e tecnólogas/os. A cita será os días 13, 14 e 15 de maio. Nas cidades de Vigo e Ourense participarán un total de 19 investigadores e investigadoras dos campus das dúas cidades, xunco con outros expertos doutras universidades e entidades.
En Vigo haberá un total de doce charlas sobre seis temáticas diferentes, 11 das cales estarán a cargo de investigadores e investigadores pertencentes a grupos e centros de investigación da Universidade de Vigo como atlanTTic (Centro de Investigación en Tecnoloxías de Telecomunicación), CIM (Centro de Investigación Mariña), CINBIO (Centro de Investigación en Nanomateriais e Biomedicina), Cintecx (Centro de Investigación en Tecnoloxías, Procesos Industriais), Ecobas (Economics and Business Administration for Society), e o VQCC (Vigo Quantum Communication Center). Tamén haberá unha charla dunha investigadora pertencente ao IIM-CSIC (Instituto de Investigacións Mariñas).
Dentro das diversas temáticas, nas charlas trataranse temas de actualidade como o impacto da Intelixencia Artificial na sociedade, a importancia do enfoque circular e sustentábel nas actividades que afectan á contorna ou a necesidade de cuestionarse a veracidade nas imaxes e vídeos que se comparten nas redes sociais.
As charlas son de acceso libre e gratuíto, ata completar aforo, e serán os días 13, 14 e 15 de maio a partir das 20.00 horas no bar Cañaveral, situado na Portal do Sol, 6, e no bar El Castro, na rúa Paseo de Alfonso XII, 2. Ademais de charlas, a programación de Pint of Science Vigo incluirá concursos como o Trivial científico e sorteos con regalos para o público asistente. Toda a información sobre as charlas e as actividades está dispoñíbel na páxina web do evento.
En Ourense están programadas sete charlas ao longo de tres días (13, 14 e 15 de maio), nas cales sete investigadores que desenvolven o seu traballo e/ou están vencellados á provincia de Ourense, tocarán unha ampla diversidade de temáticas. Estas abranguerán dende os trastornos alimentarios até a pegada do Homo Erectus organizadas en catro temáticas: Mente marabillosa, A nosa sociedade, Tech me out! (tecnoloxía) e Planeta Terra.
Entre os grupos, institucións e centros de investigación aos que pertencen os e as poñentes, destaca a UVigo a través do GEAAT (Grupo de Estudos de Arqueoloxía, Antigüidade e Territorio), así como a UNIR (Universidade de Logroño) e a Universidade de Santiago de Compostela. Así mesmo, o evento contará coa colaboración do Campus Auga e a Facultade de Historia de Ourense.
As charlas serán de acceso libre e gratuíto ata completar aforo os días 13, 14, e 15 a partir das 19.00 h no bar Torgal (rúa Celso Emilio Ferreiro, 20) e no café-centro cultural El Cercano (rúa Cardenal Quevedo, 20). A programación recolle as charlas coma base para promover o intercambio e difusión cultural e científica na sociedade. Neste contexto, ademais dos relatorios haberá sorteos con regalos para o público. A información do evento pódese atopar na web de Pint of Science.