Vueling presenta un buscador de voos 2.0
venres, 18 de febreiro do 2011
Vueling, a compañía de baixo custe, vén de desenvolver
un buscador de voos ligado á filosofía das redes sociais. A xuízo da empresa,
falaríamos do primeiro procurador 2.0 do mercado que abrolla do sector, o que
entre outras cousas quere dicir que o usuario, o viaxeiro, estaría en disposición
de participar máis activamente nas pescudas e gozar dun trato máis
personalizado. O servizo apóiase directamente no Facebook, unha rede social a
través da que poderemos incorporar a ferramenta (o buscador de Vueling) no noso
perfil e compartilo logo coas amizades en liña, así como incluílo no blog ou páxina
web que teñamos en activo.
“Esta nova
funcionalidade”, informa a compañía, “responde
á evolución tecnolóxica na que está mergullada a compañía e cuxo obxectivo é
achegar solucións eficaces e dinámicas aos novos hábitos dos consumidores”.
Podemos atopar o servizo na páxina que a firma ten no Facebook.
Resumindo, a idea básica é permitirnos, logo de ter integrado a ferramenta no
noso perfil, facer procuras de voos dunha maneira máis doada, “sen que sexa preciso abandonar o sitio de
Internet no que nos atopemos”.