A Coruña inaugura un novo acubillo de emprendemento e innovación, Accede Papagaio

Na mañá de onte A Coruña estreaba o novo Centro de Empresas Accede Papagaio, un viveiro municipal para promover iniciativas empresariais locais marcadas pola innovación. Á inauguración deste punto empresarial asistían: o alcalde da cidade, Xulio Ferreiro, o concelleiro de Emprego e Economía Social, Alberto Lema, membros da Corporación municipal e representantes de institucións e entidades do tecido empresarial da cidade. Indo ao espazo en cuestión, cómpre sinalar que consta de 74 módulos de traballo, atópase no centro da cidade e conta con 700 metros cadrados, ten capacidade para acoller a un total de 62 módulos que darán acubillo tanto a empresas en fase de preincubación (aínda por constituír) como empresas que non superen os dous anos dende o seu nacemento.
Alén dos espazos encamiñados ás iniciativas empresariais, Accede Papagaio posúe instalacións destinadas a outros fins. É o caso do espazo Nube, con capacidade para 12 módulos de traballo, pensado para persoas que non vaian ter unha estadía permanente no centro. O Papagaio tamén ten un espazo Conecta, de 170 metros cadrados, de cara a potenciar o networking a través de charlas, xornadas, debates e outras actividades colectivas.
Asemade, o Centro de Empresas Papagaio achegará cursos de formación municipais que terán temática empresarial. De feito, na tarde de onte tiña lugar a primeira sesión das Xornadas Planeta Coworking, que contou coa presenza de emprendedores salientables en traballo colaborativo como Raúl do Pozo Ortés (director executivo e socio fundador de Cink Emprende), Manuel Zea (CoworkingSpain) e Vanessa Sans (consultora de Happy Working Lab).
Engadir que as persoas interesadas en optar ao uso deste centro poden presentar a súa solicitude ao Concello, xa que Accede Papagaio conta cun sistema de convocatoria aberta e de carácter permanente. As bases reguladoras sinalan que un comité técnico (conformado por: persoal municipal, representantes da Universidade da Coruña, IGAPE, Cámara de Comercio e entidades do sector privado especializadas en materia de emprendemento) avaliarán os proxectos que queiran asentarse no dito espazo. Dende hoxe, o comité técnico, encargado de avaliar os proxectos que optan a entrar no Papagaio, esta a analizar xa as primeiras solicitudes.
Para máis información sobre Accede Papagaio (bases da convocatoria para a presentación de solicitudes e requisitos para optar ao uso das instalacións) cómpre visitar a súa web ou o Facebook.