A EE de Telecomunicación despide preto dun cento de estudantes

Este primeiro de xuño celebrouse na Escola de Enxeñería de Telecomunicación o acto de graduación da quinta promoción do Grao en Enxeñaría de Tecnoloxías de Telecomunicación e da terceira do Máster en Enxeñaría de Telecomunicación. En total, graduáronse 69 estudantes da primeira e 20 da segunda das titulacións. O acto foi presidido polo alcalde de Vigo, Abel Caballero; a comisionada para o Vigo Tecnolóxico, Edita de Lorenzo e o director da Escola, Íñigo Cuiñas. Na cita participaron tamén Alfredo Ramos, director xeral de R, e Iago Soto, director executivo (CEO) da firma galega Quobis. Ramos e Soto lembraron cadansúa experiencia na EET (ambos tituláronse nesta escola) e fixeron un percorrido polas carreiras profesionais, animando ás/aos estudantes presentes a tomar o vieiro da innovación e o emprendemento TIC.
En palabras de Cuíñas, Ramos e Soto representan “dúas traxectorias profesionais de éxito, unha dirixindo un operador de telecomunicacións territorial pero cunha implantación moi importante e o outro como emprendedor cunha empresa en crecemento e que dá emprego a máis de 35 enxeñeiras e enxeñeiros saídos da escola”. O director da EET reivindicou na súa intervención o papel das e dos “telecos na evolución da sociedade dende a etapa industrial á era da información e o coñecemento”. Segundo explicou, “as tecnoloxías, os procedementos, os sistemas, os desenvolvementos de moitos profesionais da telecomunicación, saídos da escola de Vigo e de tantas outras, levan ao mundo máis aló do imaxinado hai un feixe de anos”.
Cuiñas convidou aos estudantes a “seren os actores da nova sociedade tecnolóxica”, unha “nova liga” na que as TIC “permitiranvos exercer a vosa profesión en calquera sector da nosa economía”.