A UDC e a firma Inycom selan un acordo para dotar á Universidade de escritorios virtuais
venres, 5 de abril do 2013
A
Universidade da Coruña vai modernizar integramente a súa
metodoloxía de ensino e comunicación profesor-alumno a través
dunha nova aposta polas novas tecnoloxías e aparellos da
información. Máis polo miúdo, do que se trata este proceso é da
implantación, nunha primeira fase, dun
milleiro de escritorios virtuais ao servizo da comunidade
universitaria (profesorado, alumnos e persoal da administración
e servizos). Esta achega de tecnoloxía canalizarase a través do
acordo asinado este xoves entre a UDC e máis a empresa aragonesa
Inycom (con sede na Coruña). O
acto de formalización oficial deste convenio contou coa presenza do
reitor, Xosé Luís Armesto, e o representante da dita firma, Gabriel
Barreiro.
Como
dixemos, o proceso incluirá unha primeira etapa de traballo na que
se fornecerá aos campus de mil escritorios virtuais. Con todo,
sinalaron os responsábeis do proxecto, o obxectivo é chegar aos
4.000 postos, e a propia iniciativa está pensada dende o seu comezo
para iso. Os escritorios virtuais permitirán que o usuario acceda
aos datos do seu computador a través de calquera dispositivo
electrónico e en calquera lugar sen ter que estar in situ
diante do seu aparello. Os datos de cada usuario estarán gardados
nun único servidor central aos que se poderá acceder desde calquera
emprazamento no que se atope o usuario, engadiron. Esta
infraestrutura, explicou o reitor, permitirá á Universidade da
Coruña “a actualización e modernización dos dispositivos
electrónicos nas aulas, nos laboratorios e nos despachos facilitando
o acceso aos estudantes e ao persoal aos seus datos”.
Pola súa parte o representante da empresa Instrumentación e
Compoñentes (Inycom), comentou que “estes contornos estaban
cada vez máis demandados por sectores nos que se require un acceso
rápido e áxil aos datos, xa que isto permite que, por exemplo, un
profesor poida acceder de forma inmediata ao seu escritorio desde a
aula en que está dando clase”.
No
acto de firma do convenio estaba presente tamén o director do
proxecto David Torres quen sintetizou os beneficios básicos que terá
a implantación dos escritorios virtuais: “Dispoñibilidade,
accesibilidade e seguridade”. Torres sinalou que “a
cuestión da seguridade dos datos era importante ao estar
centralizados nun único servidor central”, ademais, dixo,
“suporá un aforro enerxético, xa que o consumo de cada equipo
pasará de 125 a 15 vátios por equipo”. O aforro
será tamén económico ao engadir tamén o menor mantemento dos
equipos informáticos.