A axencia dixital Pekecha, distinguida nos Premios Son Muller
xoves, 30 de decembro do 2021
Este
mércores 29 de decembro celebrouse a cuarta edición dos Premios Son
Muller, organizados pola Asociación
de Mulleres Empresarias da Provincia de Lugo (AELU), un acto
celebrado no Museo Interactivo da Historia de Lugo (MIHL), no
que colaborou a Deputación Provincial cunha achega de 3.500€.
Entre
as iniciativas de emprendemento feminino distinguidas atopábase un
dos grandes referentes do sector TIC galego: Pequecha Creatividade
Dixital, firma impulsada por Verónica Ramallal e centrada en ámbitos
como a mercadotecnia en liña, o deseño de webs e aplicacións
móbiles, o deseño gráfico e as redes sociais.
O presidente José Tomé fixo saber que “os
Premios Son Muller estanse convertendo nun referente para mostrar e
pór en valor o excelente traballo que fan as mulleres da provincia
de Lugo no ámbito do emprendemento e da empresa”. Amais, salientou
o potencial deste certame para impulsar a igualdade real e efectiva
entre mulleres e homes, contribuíndo ao empoderamento das mulleres
“e incentivando ás nenas e as rapazas para que loiten por acadar
as súas aspiracións laborais”.
No acto tamén participaron a deputada de réxime
Interior, promoción do territorio e turismo, Pilar García Porto, e
o deputado de promoción económica e social, Pablo Rivera Capón, a
alcaldesa de Lugo, Lara Méndez, a subdelegada do Goberno en Lugo,
Isabel Rodríguez, representantes da Xunta de Galicia e de Abanca, e
a presidenta de AELU, Beatriz Varela.
4.500 euros en premios
Os premios Son Muller contan con 3 categorías diferentes: Son Emprendedora, Son Empresaria e Son Empresaria rural; entre as que se repartiron un total de 4.500 euros. Con este certame, a Asociación de Mulleres Empresarias da Provincia busca “promover e defender os valores humanos, sociais e profesionais das mulleres na súa condición de empresarias, favorecendo a integración e o fomento do asociacionismo entre as empresarias, emprendedoras, executivas e directivas de empresas”.
