A consola portátil ZX Spectrum Vega+ non verá a luz até febreiro

Cada vez é máis frecuente desconfiar de certos proxectos de micromecenado ante o risco que supón apoiar a iniciativas emprendidas por persoais sen experiencia que finalmente non completan o produto desexado en tempo e forma, de xeito que os mecenas desesperan por mor dos adiamentos das súas recompensas á vez que critican problemas de comunicación e falta de transparencia por parte de promotores que parecen abusar da fórmula do crowdfunding para coller os cartos e dilapidalos sen control.
Dentro dos proxectos de micromecenado máis accidentados dos últimos anos hai varios relativos á informática retro e ao mundo do ZX Spectrum, e o último destes, o que pretendía crear unha consola portátil coa estética dos clásicos Spectrum de Sinclair, a Sinclair ZX Spectrum Vega+, non é unha excepción, e despois de cobrar 100 libras esterlinas a 3.018 mecenas aos que prometeron entregarlles unha destas consolas portátiles cun milleiro de xogos de Spectrum precargados no pasado mes de setembro, temos que o proxecto foi rexistrando unha acumulación de incidencias para xustificar adiamentos, decepcionando aos moitos que querían facer deste produto un agasallo para o Nadal, e anunciando que finamente non iniciarán o envío das ZX Spectrum Vega+ até o mes de febreiro.
Dentro dun par de meses saberemos se realmente este proxecto que busca manter vivo o legado de Sir Clive Sinclair consegue ser unha realidade que satisfaga aos moitos entusiastas deste clásico da informática de 8 bits.