A reserva de libros de texto para o vindeiro curso poderán facerse a través do móbil

A directora xeral de Comercio, Sol Vázquez Abeal, participou esta mañá en Santiago na presentación da nova web da Federación de Librarías de Galicia, que preside Pilar Rodríguez Álvarez, que permite formalizar a reserva dos libros de texto para o curso educativo 2016-2017 a través do ordenador ou na aplicación específica para teléfono móbil. A Xunta colabora coa entidade nesta iniciativa que, ademais de facilitar a compra de material escolar por parte das familias, aposta polas novas tecnoloxías e a dixitalización dos procesos no sector libreiro, o que ao mesmo tempo supón mellorar a súa competitividade.
A páxina web e a aplicación de teléfono móbil facilitarán, a través dos establecementos asociados á Federación de Librarías de Galicia, a reserva dos libros de texto para todos os ciclos de Educación Infantil, Primaria, Especial e Secundaria Obrigatoria dos colexios da Comunidade galega. Deste xeito, as familias poderán reservar os libros para o vindeiro curso sen necesidade de acudir ao establecemento.
Os interesados terán que cumprimentar os datos persoais, así como os relativos ao colexio e ao curso do alumno, e ademais poderán enviar unha fotografía coa listaxe de libros de texto que necesitan ou achegar un arquivo do documento en formato electrónico. A solicitude envíase a través dun correo electrónico á librería, que poderá enviar notificacións aos clientes confirmando o pedido ou solicitar outro tipo de información que sexa necesaria para completar o pedido.
Para axudar a promover a posta en marcha deste proxecto, o vindeiro 30 de setembro se sortearán 100 estancias familiares na Ribeira Sacra durante o curso 2016-2017 entre as familias que realicen a reserva dos libros a través desta nova aplicación.
Esta iniciativa está enmarcada dentro do compromiso fixado desde a Consellería de Economía, Emprego e Industria para acadar a modernización e dixitalización do pequeno comercio e, neste caso particular, das librarías. Neste sentido, Sol Vázquez sinalou que o emprego das novas tecnoloxías por parte do libreiros reforza a súa competitividade comercial.
A Consellería de Economía, Emprego e Industria mantén unha estreita colaboración coa Federación de Librarías de Galicia, con campañas de dinamización comercial e o desenvolvemento do smart commerce e de aplicacións e webs para teléfonos móbiles.