As máis destacadas tecnoloxías para a transformación empresarial, ao detalle nun novo seminario online

Ferreira Dapía Tech Consultant and Events e o Club Empresarial e Executivo de Galicia (CEEG) organizan este 18 de marzo ás 18.00 horas un seminario online sobre as ferramentas informáticas que van marcar un antes e un despois na transformación do tecido produtivo, ferramentas que no contexto da pandemia incrementarán a súa presenza e a súa proxección. Estamos a falar da xornada Tecnoloxías disruptivas e o seu papel na dixitalización empresarial. O evento retransmitirase por streaming a través da canle do CEEG en Youtube.
Intervirá José Delgado, director executivo (CEO) de Qaroni e PLAAM que falará sobre tendencias, actores líderes, tecnoloxías revolucionarias e o papel que estas desempeñan na dixitalización empresarial. Fará un repaso sobre como a Intelixencia Artificial, a cadea de bloques (blockchain) ou a Realidade Aumentada poden achegar valores ás empresas, e de que forma están ao seu alcance dunha maneira sustentable dende o punto de vista económico.