Coremain automatizou máis de 150 procesos empresariais

A empresa galega Coremain fixo balance da actividade xerada polo seu Centro de Excelencia de Automatización. Segundo fixo saber, a través deste servizo foron automatizados con éxito máis de 150 procedementos empresariais en clientes de sectores moi diversos, como por exemplo a saúde, a banda, os seguros, o sector retallista, as telecomunicacións ou o motor.
“O balance foi moi positivo”, sinalan fontes da empresa con sede principal en Compostela, engadindo que grazas a este servizo as empresas lograron un aforro medio de entre o 40 e o 60 por cento en tarefas tan variadas como a creación de historiais médicos, a análise de solicitudes de préstamos, a tramitación de sinistros, a xestión de envíos loxísticos ou o fornecemento de liñas para portabilidades.
O Centro de Excelencia de Automatización de Procesos de Coremain está integrado por un equipo de vinte profesionais expertos nas tecnoloxías máis avanzadas. Segundo explica a empresa, do que se trata é de achegar ferramentas e recursos para aumentar a eficiencia dos procesos empresariais, diminuíndo o número de recursos humanos empregado e reducindo os erros. “En Coremain, dispomos de solucións de minería de procesos enfocadas a descubrir que tarefas poden ser automatizadas con maiores beneficios, no menor tempo posible e coa menor dificultade, para obter a maior rendibilidade”, engade a compañía, salientando que outro dos puntos fortes destes procesos radica en que son aceleradores da transformación dixital: “A automatización converte procesos executados por persoas e nos que se manexa información física, en automáticos e mediante máquinas, cun tratamento e almacenamento de datos dixital”.
Grandes compañías como Vodafone ou o grupo PSA confiaron xa en Coremain para este tipo de transformación. Concretamente, para o operador británico a empresa galega simplificou o 85% dos procedementos de provisión de servizos móbiles e fixos mediante unha plataforma RPA propia con máis de 1.500 robots que son capaces de executar 80 procesos diferentes, que antes se realizaban de forma manual. Só no último ano, a implantación desta plataforma permitiu xestionar, cada mes, máis dun millón de eventos de forma totalmente autónoma.