Dispoñíbel unha nova aplicación da Xunta para baixarmos información xeográfica
luns, 6 de xuño do 2016
Os internautas xa temos
á nosa disposición unha
nova aplicación web para o Centro de Descarga de Información
Xeográfica. O recurso foi achegado pola Consellería de Medio
Ambiente, a
través do Instituto de Estudos do Territorio (IET) e en colaboración
coa axencia AMTEGA. A nova ferramenta, salientan estes
departamentos da Xunta, é “máis doada de usar e abrangue un
meirande volume de arquivos”. A aplicación, que se centra en
permitirnos baixar mapas e ficheiros xeorreferenciados en diferentes
formatos, implica un importante incremento dos arquivos dispoñíbeis.
En termos concretos, estes pasaron dos 46.945 arquivos existentes na
versión anterior (que supoñían 1,1 terabytes de información) aos
272.243 arquivos (3,2 terabytes) actuais.
Segundo relatan o IET e
máis AMTEGA, con esta nova versión, “trátase de acadar un triplo
obxectivo: facilitar o uso da web por calquera cidadán; aumentar a
información dispoñíbel; e incorporar a información en distintos
formatos para o uso por parte dos profesionais”. Os organismos
destacan tamén os esforzos envorcados para lograr un recurso
especialmente “amigábel”, grazas á incorporación dun novo
visor xeográfico no que o usuario pode buscar un ámbito territorial
determinado mediante procuras por topónimo, coordenadas ou códigos
catastrais.
Lembrar que a
incorporación de miles de novos ficheiros con contido xeográfico
permite actualmente o acceso e o uso público dun total de 272.243
ficheiros, entre series cartográficas en PDF (a escalas 250.000,
100.000 e 5.000), ortofotografías aéreas de distintos anos, mapas
de usos e ocupación do solo en formato shapefile, ficheiros
en formato ráster e ficheiros de datos LIDAR.