Edisa aplica os seus servizos na empresa líder do eido farmacéutico almeriense

A compañía española Edisa -fundada en 1983- ten como principal obxectivo o desenvolvemento de solucións e servizos de xestión empresarial. Unha das súas plataformas, a denominada Libra, foi o ERP que vén de ser elixido por HEFARAL (Hermandad Farmacéutica Almeriense), empresa do sector da distribución farmacéutica. Deste xeito, HEFARAL servirase de Libra como ferramenta para cubrir todos os seus procesos de negocio e xestión. Pois Libra é unha plataforma de xestión empresarial que achega as prestacións dos principais produtos do mercado tecnolóxico actual, coa vantaxe engadida de que cubre de maneira axeitada os requisitos específicos do sector, tanto na área loxística coma na que atinxe á normativa e lexislación que rexe a actividade do sector farmacéutico.
Asemade, Libra inclúe un conxunto de aplicacións totalmente integradas para cubrir os procesos de negocio e os de xestión cunha elevada capacidade de adaptación ás necesidades de cada empresa. Engadir que funciona en modo cliente-servidor ou mediante acceso desde un navegador en todas as súas funcións.
O afianzamento de Libra en HEFARAL desenvolveuse ao longo de doce meses, durante os cales se aplicaron os módulos: financeiro, sección de crédito, aprovisionamento, loxística e vendas. Amais disto, deseñouse un plan de probas específico co gallo de garantir unha axeitada posta en produción para non perder ningún dos servizos achegados aos socios de HEFARAL.
"Un dos alicerces nos que se baseou a introdución de Libra en HEFARAL foi a formación" e, como sinala o xerente de HEFARAL -Jesús Azcona-, "a integración por parte do provedor, neste caso Edisa, que foi importante. O equipo destinado ao proxecto traballou co director do proxecto, durante todo o proceso de implantación, conseguindo que non se perciba a fronteira cliente-provedor".
Por último, dicir que a día de hoxe Libra conta con máis de 500 casos de éxito en 60 sectores de actividade diferentes, sendo líder a nivel nacional nalgúns destes, como distribución farmacéutica, pesca e conxelados ou extrusión de aluminio.