GoPro VR achega vídeos en 360 graos producidos con cámaras GoPro

Na feira NAB de Las Vegas está presente estes días GoPro, aproveitando o encontro para amosar aos profesionais as súas solucións de realidade virtual, tecnoloxía para a que non cesa de ampliar o seu catálogo con produtos como o array de 16 cámaras dispostas en 360 graos Odyssey, ou o máis manexable array de 6 cámaras dispostas en forma de cubo Omni, e para potenciar estes produtos presenta agora GoPro VR, unha plataforma para ver e compartir contido inmersivo en liña, de xeito que podemos atopar aí unha selección de vídeos en 360 graos rexistrados con cámaras GoPro, e que poden verse directamente na web, pero tamén a través de aplicacións móbiles, sendo posible empregar tamén as solucións como o cartón de Google para poder gozar destes vídeos a xeito de realidade virtual.
Durante o NAB 2016 GoPro tamén está a presentar á industria audiovisual solucións personalizadas para poder facilitar a transmisión de vídeo sen fíos que facilitarán a produción de retransmisións de vídeo en 360 graos en directo, que confían en que en poucos meses podamos ver en acción en distintas competicións de motor.