Gradiant afronta as probas piloto do seu sistema de cálculo automático de persoas en tempo real
martes, 30 de xullo do 2013
O
centro tecnolóxico Gradiant e
a Fundación Novacaixagalicia
puxeron en marcha a pasada fin de semana as probas piloto do sistema
APC de análise de tráfico de persoas e afluencia de público en
tempo real. A fundación galega puxo a disposición deste proxecto de
Gradiant o auditorio do seu Centro Cultural de Vigo, onde se levaron
a cabo estas primeiras experiencias de campo. En palabras dos
responsábeis do centro galego de telecomunicacións, estamos ante
“un enorme paso adiante no desenvolvemento desta tecnoloxía,
que permite coñecer con total exactitude e decontado a afluencia en
calquera local e o cálculo de asistentes en tempo real, mediante
sensores de vídeo 3D emprazados nas entradas do recinto”. Por
certo que estes sensores, explica Gradiant, son semellantes aos que
se empregan nas videoconsolas de última xeración.
O
sistema APC está na vangarda das tecnoloxías de análise avanzada
de vídeo, e grazas ás súas especificacións técnicas, engade
Gradiant, permite acadar resultados máis avanzados e detallados que
equipos moito máis potentes e voluminosos, pero a unha fracción do
seu prezo. O equipo en cuestión, como dixemos, instalouse na porta
principal do Centro Cultural Fundación Novacaixagalicia de Vigo e
controlouse remotamente vía Web polos investigadores de Gradiant. Os
resultados desta primeira proba piloto son, en palabras dos
profesionais galegos, “esperanzadores”. De feito, arroxan
unha taxa de exactitude de máis do 95%, unha cifra practicamente
igual á que arroxou a proba de laboratorio, pero neste caso en
condicións non controladas.