Gradiant define na IoT Week os avances da Internet das Cousas para o sector primario

A semana pasada, entre o 31 de maio e o 2 de xuño, celebrouse na capital de Serbia, Belgrado, o encontro IoT Week 2016, centrado no ámbito da Internet das Cousas (Internet of Things, IoT). A xuntanza, que contou coa presenza activa de case medio milleiro de profesionais e investigadores de todo o mundo (amosando o máis avanzado das tecnoloxías dos obxectos conectados e establecendo ligazóns para futuras colaboracións), tivo presenza galega. Máis en detalle a do Centro Tecnolóxico Gradiant, que acudiu en calidade de referente europeo en innovación IoT. Segundo nos contan dende Gradiant, durante as charlas, as conferencias e as demostracións desenvolvidas ao abeiro da IoT Week, debulláronse os aspectos máis salientables do impulso actual das tecnoloxías dos obxectivos conectados. Fíxose especial fincapé nos retos expostos por eidos de aplicación, como as Cidades Intelixentes e máis o sector primario.
Nun plano máis técnico, informa Gradiant, emprestouse especial atención á interoperabilidade e á estandarización, e sobre todo á seguridade e protección dos datos, isto último motivado en parte pola recente entrada en vigor da nova Regulación Xeral Europea de Protección de Datos.
A xuntanza tamén amosou a firme aposta da Comisión Europea polas tecnoloxías IoT coma un dos alicerces da estratexia de Mercado Dixital Único. Segundo engade Gradiant ao fío do devandito, os plans da Comisión apuntan a programas e convocatorias de proxectos “nos que se fomentará unha meirande hibridación sectorial para axudar a horizontalizar as cadeas de valor e derrubar as barreiras tradicionais entre sectores”. O centro tecnolóxico galego tamén destacou o anuncio no evento da publicación do libro branco Europa-China sobre IoT, que vén acompañado dunha serie de medidas para reforzar a cooperación Europa-China en materia de estandarización e proxectos conxuntos.
Respecto do papel desenvolvido en Belgrado por Gradiant, a súa participación en IoT Week centrouse en afianzar os avances na aplicación destas tecnoloxías no sector primario, que é, precisamente, unha das prioridades da Alianza Europea para a Innovación na Internet das Cousas (AIOTI). O director xeral de Gradiant, Luis Pérez Freire (tamén presidente do Grupo de Traballo 06 de AIOTI, centrado nos ámbitos Smart Farming & Food Security), dirixiu a sesión Agricultura intelixente: maior rendemento, mellor calidade, aumento da eficiencia celebrada o día 1 de xuño.
A devandita actividade contou con presentacións de investigadores referenciais no ámbito IoT, así como de representantes de empresas do sector agroalimentario de Europa do Leste. A sesión, informa Gradiant, serviu entre outras cousas para constatar “un consenso destacable en canto o papel fundamental que a Internet das Cousas vai ter no futuro inmediato do sector primario a nivel global”, dado que as tecnoloxías IoT albíscanse xa como ferramentas indispensables para aumentar a produtividade e contribuír a unha maior sustentabilidade. Neste senso, tamén se falou na sesión dun dos grandes retos para a adopción masiva das tecnoloxías avanzadas dos obxectos conectados no sector primario a medio prazo, un reto que consiste en asegurar o retorno de investimento nun período de tempo razoable. Para isto, explica o centro tecnolóxico, “debe terse en conta o tamaño das explotacións agropecuarias, con diferentes necesidades e diversas capacidades de investimento”.