Grande confusión ao redor dos selos de verificación de Twitter

Dende Twitter anunciaran que o 1 de abril iniciarían a retirada dos selos de verificación de contas que non pagasen por Twitter Blue, pero na práctica o único check que borraron foi o da conta principal de Twitter de The New York Times (deixando as súas contas secundarias como verificadas), movemento totalmente arbitrario que responde á mala relación de Elon Musk co medio, o que considera despectivamente como propaganda e «equivalente á diarrea», defendéndose da discriminación que fai con eles asegurando que son «incriblemente hipócritas» xa que o xornal insta aos lectores a subscribirse.
Este movemento de Twitter pode ser moi perigoso, pois cando un introduce na caixa de busca «New York Times» ve como aparecen contas secundarias do medio (verificadas) pero non a conta principal, polo que entendemos que unha vez que remate a eliminación de checks aparecerán contas que non terán nada que ver co medio, pero que si estean subscritas a Twitter Blue, facilitando a suplantación de identidade e a difusión de falsidades.
A limpa de selos de verificacións parece estar a ser substituída temporalmente por unha nova descrición destes checks azuis, que agora inclúen unha lenda asegurando que «esta conta está verificada porque está subscrita a Twitter Blue ou é unha conta verificada con anterioridade», ou sexa, que non quere dicir nada, porque así non hai xeito de saber se é unha conta relevante ou simplemente dun usuario que paga mensualmente, o que, aparte de ambiguo tamén é perigoso.
Cómpre salientar que unha boa parte dos usuarios máis relevantes de Twitter aseguraron que non ían pagar por Twitter Blue (lembrando que non pediron nunca o check azul e que realmente debería ser Twitter quen lles pagase por crear contidos na súa plataforma), e se as figuras máis destacadas carecen do selo de verificación, este distintivo perdería todo o seu valor, polo que non sería de estrañar que nas vindeiras semanas Musk anunciase que finalmente non vai borrar as verificacións das contas con máis usuarios, como tamén aseguraron que vai acontecer coas contas de empresa.