Movistar mellorará a experiencia dos clientes no seu novo espazo en Compostela

Movistar inaugurou este luns 28 en Santiago un novo espazo destinado a converterse nun dos principais puntos de encontro entre a compañía de telecomunicacións e os seus clientes reais e potenciais. A sede ten todos seus elementos dispostos para favorecer esta vontade de achegamento da empresa á cidadanía.
Está emprazada na rúa República do Salvador, no número 16, e, segundo apunta a operadora, caracterízase pola “súa alta dotación tecnolóxica” e polos recursos postos en xogo para “mellorar a experiencia dos usuarios”. O espazo, “un centro de tecnoloxías abeto e próximo ao público”, foi apadriñado na súa estrea polo xogador turco do Monbus Obradoiro, Kartal Ozmizrak.
Tamén chama a atención por contar con puntos de atención ao público “innovadores, flexibles e tecnolóxicos” e por dispor dun novo sistema de rede virtual (VDI), dun servizo de xestión do tráfico e de sistemas de prezos integrados nos dispositivos, “que facilitan a información solicitada polo usuario”.
Estes detalles foron debullados na apertura oficial por Demetrio Hinojosa, responsable comercial de Movistar en Galicia, quen lembrou que grazas a este novo espazo os composteláns “poderán coñecer de primeira man e interactuar cos produtos, descubrir as últimas novidades e todo o que ofrece a televisión de Movistar”. E todo, dixo, acompañado dos máis estritos protocolos de seguridade e desinfección.