Nova alerta por un virus que se propaga polo Messenger de Microsoft

A alerta foi dada onte polo xornal La Nación (un dos máis importantes da Arxentina) e, segundo o dito no artigo, a ameaza xa está a “causar estragos” no continente. Trátase dun dos denominados vermes que se reproduce de xeito automático e se reenvía a través dos servizos de mensaxeiría de Microsoft, tanto na súa versión tradicional como na que se ofrece por medio do Live Messenger. Segundo o descrito no dito escrito e ratificado pola firma Eset (responsable do antivirus Nod32), nas nosas xanelas de diálogo xorden frases como "Lembras canto tiñas o pelo así?" ou "Esta é a foto nosa que vou poñer en MySpace", convidándonos a descargar e executar o arquivo en cuestión que non é outra cousa que un virus que transforma a computador nun pczombie que reenvía a mensaxe tantas veces como sexa posible.

Como único consello para non caer neste tipo de trampas, o responsable de Eset para Latinoamérica, Cristian Borghello dixo que "é importante non aceptar nunca un ficheiro non solicitado por MSN, e, no caso de querer facelo, hai que estar seguro de que sexa o noso contacto quen realmente estea detrás do devandito envío”.