O 112 axúdase dunha nova app para localizar a persoas en apuros

Localizar a persoas que se atopan nunha situación de urxencia non é sempre doado, dende o Centro de Atención de Emerxencias 112 Galicia sábeno moi ben. Para superar este atranco o 112 conta xa cunha nova aplicación que fará máis sinxela a localización de persoas en apuros. O xerente da AXEGA, Juan José Muñoz, presentaba onte esta aplicación de xeolocalización chamada Alpify, nun acto no que tamén participaron o vicepresidente da Xunta, Alfonso Rueda, acompañado do director xeral de Emerxencias e Interior, Luís Menor.
A aplicación ten un manexo ben simple: con só premer o botón vermello de emerxencia, enviarase un aviso ao 112, que recibirá a situación da persoa que pide o auxilio, xa sexa en zonas urbanas ou de montaña. No caso de perder a cobertura do móbil, a aplicación envía unha mensaxe de texto ao 112 e sitúa a urxencia para o centro coordinador cun rango de erro de entre 3 e 10 metros.
Grazas á ferramenta, o CAE 112 poderá localizar con maior precisión a través de GPS cando unha persoa chame ao Centro de Atención ás Emerxencias, poderase localizar a persoas que fosen dadas por desaparecidas; enviar alertas adaptadas á localización onde se atopa a persoa; e “con importantes vantaxes na procura de persoas maiores con senilidade e para reforzar a seguridade en zonas rurais”, fíxose saber na presentación.
A aplicación, engadiuse, permitirá ao usuario conectar directamente co 112 Galicia, dende onde localizarán a súa situación e o traxecto realizado nas últimas horas para poder emprestarlle a axuda que precise.
O emprego desta ferramenta, baseada na tecnoloxía GPS, 4G/3G/GPRS e GSM, permitirá que, no caso de aviso por parte dunha os servizos de emerxencias poidan coñecer exactamente a súa situación ou o percorrido realizado ata chegar ao punto no que se atopa, o que permitirá reducir os tempos de resposta.
Descargable pero aínda non en galego
Alpify pódese descargar de balde dende o propio smartphone en Iphone, Android e Blackberry ou a través da web da app. Por desgraza, a ferramenta non se atopa aínda en galego, cousa que os medios e os internautas da nosa terra están a pór no punto de mira das súas críticas, incidindo no feito de que Alpify só está dispoñible en castelán, catalán, inglés e francés (agardamos que esta situación se arranxe e axiña poidamos contar con versión na nosa lingua).
O xerente da AXEGA, Juan José Muñoz, presentaba onte esta aplicación de xeolocalización, nun acto no que tamén participaron o vicepresidente da Xunta, Alfonso Rueda, acompañado do director xeral de Emerxencias e Interior, Luís Menor.