O BNG estrea canle de comunicación en formato podcast, Radio Frontón

O BNG estreou este mes de setembro unha nova canle de comunicación, Radio Frontón, un podcast que fará divulgación a través das súas redes sociais nun formato que, en palabras da agrupación nacionalista, “ten cada vez máis seguidoras e seguidores”. O obxectivo, engaden, “é contribuír ao debate sobre cuestións de actualidade ou temas que preocupan á cidadanía e que non sempre son capaces de abrirse espazo na esfera pública”. Radio Frontón arranca poñendo o foco na cuestión da gordofobia.
Tomando como punto de partida unha recente reflexión da eurodeputada Ana Miranda no seu muro de Facebook, este primeiro podcast repasa este asunto con persoas expertas na materia, procedentes das áreas da psicoloxía ou da sanidade pública, entre elas a deputada e médica, Iría Carreira. Carreira explica que “a obesidade está cualificada como unha patoloxía desde fai moito tempo, enfermidade que ademais é un factor de risco para padecer outras, pero non pode ser amparo para actitudes discriminatorias e que mesmo poden xerar outro tipo de problemas de saúde nas persoas que as sofren”, alega.
A orixe desta primeira entrega do podcast está como dixemos nunha reflexión de Miranda nas redes sociais: “Abres o Facebook e xa che lembra que debías adelgazar, facer exercicio e dietas milagrosas, botar cremas. Aquí vai a resposta a tanta gordofobia inherente, persistente, maleducada. Farta de gordofia nas redes, nos ollares e no subliminar”.
A deputada do BNG no Parlamento Europeo, explica no podcast o porqué dese comentario. “Como moitas outras persoas teño tendencia a engordar e levaba varios días mosqueada porque cada vez que abría o teléfono aparecíanme anuncios de cremas adelgazantes e redutoras, ximnasios milagreiros e non sei cantas cousas máis. E ese día cabreeime e decidín poñer o comentario”, explica.
Radio Frontón, que pode escoitarse xa nas redes sociais do Bloque, emitirase con periodicidade regular abordando temas de actualizade cos que contribuír a poñer o foco en cuestións de gran afectación social, aportando voces e argumentos ao debate de temas que interesan á cidadanía.