O CiTIUS exercerá de entidade colaboradora no Talentum Startups de Telefónica

O centro CiTIUS da Universidade de Santiago informa que vai actuar como “entidade aceleradora” do programa Talentum de Telefónica. Máis polo miúdo o seu labor do CiTIUS centrarase no apartado Talentum Startups, que é unha proposta da operadora para apoiar ao alumnado de carreiras tecnolóxicas e ao ecosistema emprendedor, achegándolles os escenarios de traballo máis axeitados para o medre e a materialización das súas iniciativas innovadoras.
Para esta convocatoria, o dito programa fornece seis bolsas para a realización de prácticas no CiTIUS durante 6 meses en réxime de xornada parcial (5 horas/día), cunha remuneración de 500 euros mensuais. Terán prioridade aqueles candidatos e candidatas que procedan de áreas tecnolóxicas.
As probas de selección, para as que é preciso inscribirse previamente na páxina oficial do evento, desenvolveranse o vindeiro 21 de abril ás 11:00 horas na Escola Técnica Superior de Enxeñaría. Logo, informa o CiTIUS, faranse chegar ao xurado de Talentum encargado de tomar a decisión final sobre os aspirantes ao programa. Segundo engaden fontes do centro, as persoas elixidas completarán o seu período de prácticas no CiTIUS incorporándose así a proxectos tecnolóxicos que serán propostos desde os programas científicos do centro.
“A participación como organismo acelerador”, engaden os responsables do centro innovador da USC, “achega ao CiTIUS a oportunidade de participar nun dos programas de captación de talento de maior prestixio estatal”. Ademais, “permitirá aos bolseiros desenvolver a súa actividade emprendedora nun entorno ideal para proxectos innovadores”.