O Concello de Lugo anuncia novos avances no ámbito da eAdministración

O Concello de Lugo fixo saber hoxe que está a dar avances na implantación no seu seo da Administración Electrónica. Este proceso, xa activo, traducirase na introdución dunhas maiores “rapidez e comodidade” na resolución de trámites por parte da cidadanía lucense. Así o deu a coñecer a concelleira de Concello e Cidadanía, Rosana Rielo, quen mantivo un encontro con técnicos do Concello de Xixón, administración recentemente recoñecida cuns importantes galardóns polo seu labor en materia TIC (grazas os servizos CuidaGijón e ObservaGijón o Goberno local acadou o premio ao Mellor Servizo de Administración Electrónica e ficou entre os finalistas do Mellor Proxecto de Participación Cidadá e Gobernos Abertos, respectivamente).
O Concello de Lugo puido tomar nota dos pasos dados polo Executivo xixonés en materia tecnolóxica e anunciou a súa firme intención de “progresar na implantación da eAdministración, unha nova vía de contacto cos lucenses para ofrecer un servizo mellor, máis rápido e máis eficaz”.
A edil foi acompañada dun comité técnico do que forman parte distintos servizos municipais co obxectivo de acadar que todos eles participen na modernización administrativa dos mesmos, unha modernización que segundo avanzou Rielo estará implantada a finais de ano, “o que favorecerá a transparencia da institución”.
A concelleira tamén fixo saber que o propósito da xuntanza en Asturias foi “avanzar na modernización do Concello, impulsando canles de participación coa cidadanía e evolucionar cara unha estratexia de goberno aberto”. A edil salientou que a eAdministración permitirá realizar “procedementos sen ter que desprazarse ata os servizos municipais, achegando a administración aos seus usuarios”. Ademais, dixo, “beneficiará á cidadanía ao axilizarse os trámites e os procesos burocráticos e evitarase a perda de tempo e desprazamentos”.
Tamén lembrou que o Concello de Lugo foi un dos primeiros municipios de máis poboación de Galicia en poñer en marcha o funcionamento do Rexistro Electrónico.