O Concello de Ponteareas facilitará con formación e asesoramento a dixitalización dos negocios

O Concello de Ponteareas vén de dar un novo paso para facilitar a adaptación do tecido empresarial, hostaleiro e comercial do municipio á nova realidade marcada pola COVID. Con este motivo, puxo en marcha a iniciativa Dixitaliza o teu negocio, que inclúe plans de formación e de asesoramento individualizado para os comercios locais e a planificación de estratexias empresariais adaptadas ao novo contexto.
O programa Dixitaliza o teu negocio, posto en marcha pola Concellaría de Promoción Económica que dirixe Eva Gil, contará cun plan de formación destinado ás o aos comerciantes para amosarlles, “de xeito práctico e sinxelo” as posibilidades do comercio electrónico, as diferenzas existentes entre cada un das ferramentas de ecommerce e comunicación así como todos os medios dixitais existentes. O Concello engadiu que nunha segunda fase do proxecto as o os comerciantes contarán con asesoramento individualizado que permita o acompañamento dos comercios na súa dixitalización.
O obxectivo desta iniciativa é, en palabras do Goberno local, “desenvolver o potencial que ten todo o tecido empresarial do municipio e axudar na súa adaptación ás novas circunstancias do mercado e aos novos hábitos de consumo, sen perder a esencia do comercio local, de tempada e de proximidade”.
A formación estará a cargo de profesionais en transformación tecnolóxica e con amplo coñecemento das múltiples demandas que poidan xurdir de cada caso empresarial específico.
Ao abeiro do programa estableceranse diferentes liñas de comunicación e difusión, contando co tecido asociativo do concello, para crear, en palabras do Goberno local, “unha rede sólida de apoio entre a administración, o sector e a veciñanza”. Todo isto complementarase con iniciativas de comunicación para dar visibilidade ao proxecto a través da creación da imaxe do programa e a creación dunha landingpage (www.dixitalizaponteareas.com) que estará operativa o día da presentación do programa, onde os representantes dos negocios tamén poderán rexistrarse a través do formulario de contacto (info@dixitalizaponteareas.com) e a creación dunha campaña de promoción nas redes sociais (Facebook e Instagram principalmente).