O fenómeno influencer abriu os tres días de relatorios virtuais da Érték Conference

Este martes 17 inaugurouse, na compaña de tres influencers nas redes sociais, a segunda edición da Érték Conference, evento promovido por un grupo de estudantes do grao en Publicidade e Relacións Públicas e que, dada a situación sanitaria, desenvólvese este ano de xeito virtual, tentando achegar ao alumnado da Facultade de Ciencias Sociais e da Comunicación ás experiencias dunha serie de profesionais da mercadotecnia e da publicidade.
Retransmitida a través da plataforma Twitch, a conferencia, que conta co patrocinio da facultade e de diferentes empresas, reúne no seu programa 15 conferencias e a mesa de influencers coa que botou a andar na mañá deste martes 17.
Moderado polo estudante Lucas Peteiro, o dito coloquio reuniu a Manel Rozas, Force, que suma máis dun millón de subscritores na súa canle de Yotube; Irene Rodríguez, Ireniusx, con máis de 700.000 seguidores en TikTok; e a xornalista de moda e tendencias Patricia Goméz, que acumula 17.000 seguidores no seu perfil de Instagram.
Esta mesa viuse precedida por un vídeo de presentación, no que alumna Sara Piñeiro deu conta dos contidos e novidades desta Értek Conference. O evento acolleu na tarde do martes unha conferencia de Miguel Conde, responsable da axencia Quattro IDCP; seguida dun “primeiro encontro co mundo da moda”, da man de Cristina Rey e Patricia Ferreira, de Mekkdes, pechando a xornada un relatorio sobre neuromercadotecnia e emocións na publicidade, a cargo de Juan Graña, director executivo (CEO) de Neurologyca.
Este mércores, Jaime Conde, de Quattro ICDP, afondará en “como crear unha axencia de publicidade”, mentres que a responsable de comunicación de Coca-Cola en Galicia, María Troncoso, “falará de sustentabilidade”, completando a mañá un relatorio do community manager do RC Celta, sobre “adaptación ao cambio” nestes de COVID.
Pola tarde, Itziar Oltra, de Airhopping, abordará “como crear unha comunidade en redes sociais”, mentres que Carmela Serantes, fundadora de The Good Shop, falará de emprendemento e o responsable de produción do Resurrection Fest, Ángel Piñeiro, farao na organización de festivais.
Por último, a Érték Conference acollerá o xoves un coloquio con Alfonso Molinelli e Óscar Parada, da axencia Tony Le Brand, sobre a importancia de “romper cos tópicos”; un relatorio do responsable de mercadotecnia de Krack, Sebastián Troyas, e unha conferencia sobre organización de eventos de Jordi Lauren e Andrés Lamosa, de PlayPlan. Pola tarde, o evento completarase cunha conferencia sobre “mercadotecnia e comunicación turística en tempos de COVID-19”, a cargo de Sergio Couto, de Edition; cun coloquio de Fernando Rábade e David Serantes, de Mondo Fashion Show, sobre a “descentralización da moda en España”; e cunha segunda abordaxe á organización de festivais, de man de Carlos Domínguez, fundador de O Marisquiño.