O tablet ARCHOS 80 G9 xa está dispoñible con disco duro de 250 Gb

xoves, 29 de decembro do 2011 Marcus Fernández

JPEG - 89.1 KB
Ao funcionar con Android 3.2 estamos ante un tablet bastante completo

A semana pasada anunciamos que ARCHOS vai pór á venda nos vindeiros días un tablet con pantalla táctil capacitiva de 7 polgadas e sistema operativo Android 3.2 por só 199 euros, polo que sería un dos dispositivos deste tipo máis competitivo do mercado, pero en vista de que será difícil conseguilo de cara aos agasallos de Reis, podemos recomendar unha alternativa un pouco máis cara, pero igualmente interesante: o tablet ARCHOS 80 G9. Falamos dun tablet con pantalla de 8 polgadas cunha resolución de 1.024 x 768 píxeles, cun procesador OMAP4 a 1 GHz, Android 3.2, Wi-Fi N e a posibilidade de dotalo de 3G mediante un dispositivo USB externo, que véndese por 249,99 euros na súa versión con 8 Gb de almacenamento interno (e leva un tempo dispoñible en tendas físicas españolas). Tamén conta cunha versión con 16 Gb de almacenamento que custa 279,98 euros (e que conta cun procesador a 1,2 GHz, e algunhas tendas xa o comercializan a só 258 euros), e no Reino Unido veñen de estrear unha versión que en vez de contar con almacenamento SSD opta por un disco duro interno, de xeito que por 249,99 libras (297,25 euros) pode mercarse un tablet cunha impresionante capacidade de 250 Gb, algo que non é nada habitual nun trebello deste tipo.
Cómpre destacar que estamos ante un tablet con pantalla cunha relación de aspecto 4:3, coma o iPad, de xeito que tería unha superficie un 46,72% superior que unha pantalla de 7 polgadas en 16:9, polo que estariamos ante produtos claramente diferenciados, podendo considerarse ao ARCHOS 80 G9 como unha das mellores alternativas ao tablet de Apple, tanto polo seu prezo como por gozar con prestacións como soportar contidos Flash en páxinas web, reproducir vídeos en numerosos formatos, poder ampliar a súa capacidade interna mediante tarxetas microSDHC, contar con saída HDMI (para ver os contidos en alta definición nun televisor) e contar con GPS e compás dixital para permitir a navegación por satélite.

JPEG - 108.7 KB
O ARCHOS 80 G9 conta con GPS e compás dixital

PUBLICIDADE