Os sectores aeroespacial, TIC, enerxético e metalúrxico mostran en Santiago a relevancia das matemáticas

O CITMAga (o Centro de Investigación e Tecnoloxía Matemática de Galicia impulsado polas tres universidades galegas), celebrou esta mañá a XV edición do seu Foro de Interacción Matemática Industria (Industry Day). Fíxoo na Facultade de Matemáticas da USC. Neste marco de diálogo e traballo, as compañías participantes (dos sectores das novas tecnoloxías, da electrónica, do metal ou do aeroespacial, entre outros) deixaron patente que lograron mellorar os seus produtos e servizos e reducir os custos de produción grazas ás matemáticas.
O foro é unha iniciativa promovida en colaboración coa Red Española Matemática-Industria (math-in) e conta co apoio da Agencia Estatal de Investigación -Ministerio de Ciencia, Innovación y Universidades-. Á inauguración asistiron o decano da facultade de Matemáticas da USC, Alberto Cabada; o director científico do CITMAga, Javier Roca; o presidente da Red Española Matemática-Industria, Emilio Carrizosa; xunto ao promotor do foro, o profesor Alfredo Bermúdez de Castro.
O foro reuniu a investigadores matemáticos e a representantes de empresas galegas, nacionais e internacionais, que amosaron casos reais de transferencia de tecnoloxía e coñecementos entre as matemáticas e diferentes sectores industriais.
Contouse coa participación de representantes de compañías de sectores tan diversos como o tecnolóxico (Fujitsu e Plexus), os electrodomésticos (Bosch), a metalurxia (Ferroglobe), a enxeñaría (Instra), aeroespacial e drons (Kreios Space e Vig-Sec Drone), desenvolvemento de software científico (Mestrelab) ou transformación dixital (NTT Data e Possible Incorporated). Todos eles explicaron como as matemáticas foron capaces de dar resposta a problemas concretos e servíronlles como “motor de innovación empresarial”.
Durante o encontro déronse a coñecer as “enormes e múltiples” capacidades das matemáticas e a súa aplicabilidade nunha gran parte dos retos e necesidades do tecido industrial, achegando a pequenas, medianas e grandes empresas unha tecnoloxía cun gran potencial e que non precisa de grandes investimentos para o seu uso. Con esta iniciativa “búscase ademais afianzar a importancia das matemáticas e dos perfís matemáticos na industria”, informou CITMAga, engadindo que “de modo xeral trátase de pór de relevo o poder desta disciplina á hora de ofrecer solucións aos problemas do mundo real”.