Sivsa amosa tecnoloxías de seu no encontro referencial da eSaúde en Perú

A empresa galega Sivsa, da que falamos recentemente para dar conta do seu innovador software de xestión para médicos e clínicas (o software Fenix, definido polos seus creadores como “unha nova maneira de entender a xestión de centros de saúde dende a nube”), participou os días pasados (entre o 9 e o 11 de setembro) na que está considerada a cita referencial do ámbito médico e tecnolóxico de Perú e a súa contorna. Falamos de Tecnosalud 2015, a convención internacional de produtos para a saúde e ciencias afíns, onde a empresa galega amosou solucións de seu para optimizar o traballo dos profesionais do ámbito médico, solucións como o software Fenix, precisamente.
Del, fíxose saber que se trata dunha tecnoloxía que senta as bases para a historia clínica electrónica na nube e que, dende o seu lanzamento (este mesmo ano), foi quen de facilitar ao máximo o día a día das comunidades dun bo número de consultorios e policlínicas. Tamén se fixo un repaso polas funcionalidades que pon en xogo, entre as que podemos destacar a posibilidade de controlar e axilizar de maneira fluída e intuitiva todos os procesos que se dan na actividade diaria dun espazo de saúde, dende a chamada do paciente para solicitar unha cita ata a facturación dos servizos.
Recordar que a empresa galega ten presenza no Perú dende hai uns tres anos, e alí conta con importantes clientes que xa tiran proveito do seu sistema de información hospitalaria Hoxix para a súa xestión, entre os que se inclúen centros como o Hospital Alberto Leopoldo Barton Tompson de Callao e o Hospital Guillermo Kaelin de la Fuente de Villamaría del Triunfo.
Tecnosalud, sinalan fontes da empresa galega, propiciou o encontro entre Sivsa e novos profesionais da saúde de Lima, o que serviu para establecer contacto con outros hospitais interesados en Hosix como sistema de información hospitalario.