Vedra converte a vella estación de tren de Ribadulla nun centro innovador de emprendemento

As persoas emprendedoras da contorna do concello de Vedra teñen un importante recurso do que botar man para dar forma aos seus proxectos dun xeito innovador e colaborativo (con outras persoas emprendedoras). Trátase do Centro de Emprendemento A Estación de Vedra, impulsado polo Concello, que informa que é a súa intención solicitar a súa integración na Rede Provincial de Espazos de Traballo xestionada pola Deputación da Coruña, da que forman parte enclaves de coworking como o de Carballo, o de Boiro ou de Ames (A Proa), por citar só algúns.
O proxecto xa rematou todos os acondicionamentos necesarios e dará os primeiros pasos o vindeiro mes de xuño. Salienta non só por terse habilitado na antiga estación de tren de Santa Cruz de Ribadulla, senón polo aproveitamento que fai das súas infraestruturas (o espazo de traballo colaboratorio está emprazado nun vagón de tren).
O proceso para reconverter a estación en espazo de innovación empresarial durou 15 anos e foi posible grazas ao apoio de diferentes organismos e estratexias, dende fondos nacionais, europeos, mediante empresas e obradoiros de emprego.
E cal é a finalidade do Centro de Emprendemento A Estación? A súa meta é o fomento do emprego, a dinamización do tecido empresarial do concello de Vedra, a difusión de coñecementos, competencias e habilidades tecnolóxicas e de mercadotecnia, ferramentas decisivas de cara a emprender e a poñer en marcha novos negocios.
Cómpre salientar que a iniciativa A Estación xa foi premiada: un dos seus espazos máis senlleiros, o vagón de coworking, recibiu a Mención á sustentabilidade, galardón recollido polo arquitecto Fermín Blanco dentro do certame Arquitectura e Rehabilitación de Galicia 2020.
E seguindo cos recoñecementos, o vagón foi finalista nos premios Red Clima, da Federación Española de Municipios e Provincias. O galardón obtívose na categoría de Transición enerxética, rexeneración e renovación urbana na que competiu coa Illa de Menorca, que resultou gañadora.
Para rematar engadir que o vagón coworking é un espazo eficiente dende o punto de vista enerxético, pois aliméntase de enerxía solar. Posúe tres espazos diferenciados que parten dun auditorio para presentacións, continúan nunha sala de traballo e rematan cunha sala de xuntanzas. Estamos perante unha peza histórica (Fiat RENFE 593), un vagón que formou parte dunha partida encargada polo estado español para os mundiais de fútbol do 82 e significou unha revolución no transporte de pasaxeiros de media distancia.