Geeksphone prepara unha pulseira de actividade que medirá o rendemento sexual

A compañía Geeksphone non só destaca por crear o primeiro móbil español con Android, atreverse a comercializar un smartphone con Firefox OS e ser unha das empresas detrás de Blackphone (terminal con Android orientado ás comunicacións seguras), senón que agora tamén se atreve cos wearables dun xeito que está a resultar bastante rechamante, xa que a súa pulseira de actividade Geeksme entre outras funcionalidades ten a de medir o rendemento sexual de xeito opcional e privado, así como para que os máis respectuosos co medio ambiente poidan medir a súa pegada ecolóxica.
O director do proxecto Geeksme, Ángel Sánchez Días, asegurou que a funcionalidade de medición do rendemento sexual “non está baseada no ritmo cardíaco. Será un modo especial (semellante ao modo de sono) que unha vez activado medirá cousas como o número de veces á semana, a duración, as calorías queimadas e outra moita información útil baseada en diferentes algoritmos que estamos a desenvolver. Axudará aos usuarios a ter un modo de vida máis saudable, monitorizando diferentes valores e estatísticas cando se practique o sexo”.
Este accesorio será unha pulseira de actividade como moitas outras, que monitoriza pasos, distancia, calorías queimadas, chanzos subidos e minutos activos (datos que poden rexistrarse para a súa consulta dende aplicacións móbiles e de escritorio), e tamén pode empregarse para monitorizar o sono, pero tamén conta con funcións máis prácticas como contar con notificacións do móbil (para identificar as chamadas e mensaxes entrantes) e contará con funcións de alarma e recordatorios. Ten formato de reloxo de pulso, cun marco de aluminio e unha pantalla táctil que combina tecnoloxía OLED e 12 LED e espérase a súa chegada ao mercado antes das vacacións do verán.