O programa EMEGA xa beneficiou a máis de 2.300 mulleres emprendedoras
xoves, 27 de xullo do 2023
A
secretaria xeral da Igualdade, Sandra Vázquez, fixo
balance este xoves 27 de xullo do acadado polo programa EMEGA da
Xunta para o fomento do emprego feminino, programa que ao longo dos
seus 27 anos de andaina xa beneficiou a
máis de 2.300 mulleres emprendedoras.
Neste
2023, Vázquez
destacou que estas achegas contan cun orzamento superior aos 4,8 M€
(case un 10% máis có ano pasado), cos que se prevé outorgar unhas
370 axudas. Así o dixo durante a visita que realizou a unha mercería
de Fene que recibiu 10.000 euros no marco deste programa.
Na
visita, Vázquez recordou que as axudas permiten incrementar a
presenza feminina no mercado laboral galego apoiando a posta en
marcha, a mellora e a activación de iniciativas empresariais
constituídas por mulleres. Tamén medidas complementarias para
favorecer a conciliación da vida persoal, familiar e laboral, así
como o acceso a servizos específicos de información, asesoramento e
orientación empresarial.
En
concreto, as axudas (que
se poden solicitar ata o próximo 7 de agosto)
constan de catro liñas, que son as seguintes: Emprende,
con incentivos para a posta en marcha de novas empresas por parte de
mulleres desempregadas e a creación de emprego feminino estábel
por conta propia e allea; Activa,
para favorecer a reactivación e consolidación de proxectos
empresariais impulsados por mulleres ou
a implantación
de medidas innovadoras para a mellora da competitividade; ITEF,
que pon o foco no apoio a iniciativas empresariais con carácter
innovador, con contido científico ou de base tecnolóxica promovidas
por mulleres; e a liña Concilia,
complementaria das tres anteriores, para axudar tanto ás mulleres
promotoras como ás traballadoras ao seu cargo na súa conciliación.
No
caso específico da mercería Costuras, a secretaria xeral apuntou
que a axuda de 10.000 euros recibida no marco da liña Emprende do
programa EMEGA
permitiu manter aberto o negocio que iniciara noutrora outra muller.
Beneficiarias
do programa EMEGA
Para
resultar beneficiarias, as mulleres emprendedoras deben liderar unha
microempresa ou pequena empresa validamente constituída e
domiciliada en Galicia. Entre outros requisitos, deben manter
vinculación laboral co proxecto que, á súa vez, ten que ser viábel
económica, técnica e financeiramente.
Á
hora de distribuír as axudas, teranse en conta, entre outros
criterios, o emprego feminino xerado e/ou mantido por conta propia ou
allea de carácter indefinido, a pertenza a sectores económicos nos
cales as mulleres estean infrarrepresentadas, a contribución á
integración laboral de mulleres vítimas de violencia de xénero,
con discapacidade ou desempregadas
de longa duración ou se a actividade empresarial está dedicada á
prestación de servizos de conciliación.