Galegram vaise facendo un oco firme entre os usuarios galegos de mensaxería instantánea
venres, 21 de marzo do 2014
De Galegram
xa falamos os días pasados (adiantando que
se trata dunha interface en desenvolvemento de Telegram en galego),
pero da man de Pablo Bejerano temos máis datos que achegar sobre
esta interesante alternativa ao WhatsApp na nosa lingua. Para
comezar, Galegram
só emprega o galego. Ademais, aos tres días de estar dispoñíbel
en Google Play, xa foi quen de obter case 4.000 descargas, o que non
está nada mal para unha ferramenta nova que ten que facerse un oco
entre un servizo maioritario (abrumadoramente maioritario) como
WhatsApp. Ao seu favor, por outra banda, ten detalles a seguir de
preto como “un nivel de privacidade maior có de Telegram, en cuxo
código se basea”.
Tras deste
desenvolvemento atópase un grupo de programadores que traballa no
Servizo Galego de Saúde (SERGAS), que lle deu forma a Galegram como
se dun hobby se tratara. A orixe do seu compromiso hai que rastrexala
en dúas cousas: por unha banda, a súa actitude crítica ante
WhatsApp (esa falta de seguridade que permite que calquera ferramenta
instalada dende Google Play poida acceder ás conversas do usuario)
e, por outra banda, o seu compromiso coa nosa lingua nas ferramentas
novas de comunicación. De aí a ir argallando a idea dunha
aplicación que respondese ás súas esixencias, só houbo un paso.
Para comezar, querían un
recurso onde a comunicación estivese “cifrada de punto a punto”.
Con este fin usaron a API pública de Telegram, que como lembraremos
é software libre e ten a vantaxe disto e a vantaxe-problema de que
está na nube. Isto vén a conto porque por unha banda se libera ao
noso dispositivo de ter que carretar coa información do servizo
pero, en troques, esíxese un nivel de sincronización que polo de
agora aínda non está moi afinado en Telegram e na súa base de
datos. Porén, os desenvolvedores de Galegram confían en que estes
atrancos vaian desaparecendo aos poucos. Como tamén confiamos, a maiores, que se vaian amañando igualmente certos problemas lingüísticos (provaches, móvil) que albiscamos na ferramenta e que estamos certos que irán atopando de xeito progresivo a súa forma correcta.
A día de hoxe, xa
rexistraron 12.000 descargas do programa na
súa versión para Android.