A Consellería de Cultura e Educación e a Universidade de Vigo (AtlantTIC e grupo GTI) colaboran no desenvolvemento da aplicación web CIMA, unha ferramenta de balde que bota abaixo barreiras de accesibilidade en materia de información de eventos culturais, converténdoa en accesíbel para todas as persoas destinatarias. Faino creando folletos baseados en textos sinxelos e pictogramas. A ferramenta permite xerar decontado e en diversos idiomas folletos que poidan ser lidos por lectores de PDF para seren lexíbeis de cara a persoas con problemas de visión.

Tras unha etapa complicada por mor do desastroso lanzamento do xogo Cyberpunk 2077, CD Projekt Red anuncia a súa nova estratexia a longo prazo, na que confirman que seguirán co polémico xogo futurista, que nas últimas semanas recuperou forza gañando moitísima popularidade grazas á serie de Netflix Cyberpunk 2077: Edgerunners, o que propiciou que superase os 20 millóns de copias vendidas, marcando unha clara distancia entre a percepción do público e o auténtico rendemento do xogo, que pese á súa mala sona inicial parece ter deixado un pouso que facilita a ampliación do universo do xogo de rol Cyberpunk 2077.

O concurso #LugoPorLaIgualdad, organizado na rede social TikTok pola Concellería de Muller e Igualdade Lugo co obxectivo de sensibilizar sobre a trata de mulleres con fins de explotación sexual, xa ten vídeos gañadores. Esta actividade formaba parte dos actos que organizou o Goberno de Lara Méndez para conmemorar o Día Internacional Contra a Explotación Sexual e a Trata de Persoas, que se celebra cada 23 de setembro.

O mercado empresarial actual e tamén o laboral non deixa moito marxe para a relaxación en materia formativa: a revolucionaria transformación de todos os sectores produtivas obrigan a ampliar horizontes e adicar un tempo do noso quefacer diario a actualizar coñecementos e habilidades. Xeitos de facelo hai moitos, pero na nosa terra hai empresas como Vitae Consultores que nos facilitan ao máximo estes procesos. Por exemplo co Curso Dirección e Xestión de Proxectos baixo a metodoloxía PMI 6, que chega á súa edición 23 e que ten previsto desenvolverse os días 2, 3, 7, 8, 9, 10, 12, 14, 15, 16, 17 e 22 de novembro. Achegará novamente 35 horas de formación avanzada e innovadora, a través do acostumado formato de aula virtual de Vitae.

Logo das súas pezas para revolucionar a educación, o portal galego Proxector volve á palestra cun novo especial centrado na sustentabilidade e na saúde (nosa e do planeta). Trátase do monográfico en liña Divulgación agropecuaria: na busca dunha despensa saudábel, no que se homenaxea a Juan Rof Codina, científico galego ano. O especial inclúe un vídeo TED de Svante Pääbo, premio Nobel de Medicina 2022.

Achegar os podcast e as súas potencialidades para a comunicación, a educación e a divulgación científica é o obxectivo dun curso organizado pola Área de Innovación en Educación da Universidade de Vigo, unha actividade formativa destinada ao profesorado que pon o foco nas posibilidades dos arquivos sonoros en liña para a docencia. O curso, de 20 horas de duración, impartirase a través da plataforma Moovi entre o 14 de novembro e o 14 de decembro en modalidade virtual asíncrona e o período de matrícula está aberto dende esta semana ata o 4 de novembro.

Estaba previsto que o xuízo que enfrontaría a Elon R. Musk e Twitter por mor da negativa de Musk de adquirir Twitter despois de terse comprometido a iso non terá que celebrarse, pois finalmente os representantes de Musk remitiron documentación á SEC asegurando que agora teñen a intención de respectar o acordo inicial sempre que o Tribunal de Delaware suspenda o xuízo que teñen pendente as partes.

Xiaomi presentou oficialmente os seus smartphones Xiaomi 12T e Xiaomi 12T Pro, dispositivos que teñen como principal diferenza o sensor da súa cámara traseira principal, que sería de 108 e 200 Mpíxeles respectivamente. Deste xeito Xiaomi consegue colocarse á cabeza das especificacións técnicas, sen ter que dar un salto a prezos inalcanzables.

No mes de xuño o Parlamento Europeo chegou a un acordo provisorio para que no outono de 2024 sexa obrigatorio que os móbiles, tabletas e cámaras que se venda na Unión Europa poida cargarse mediante conectores USB-C, e finalmente ratifícase a nova lexislación con 602 votos a favor, 13 en contra e 8 abstencións, de xeito que se harmonizan os cargadores dos dispositivos electrónicos para finais de 2024 e incluso engaden que na primavera de 2026 a medida se estenda tamén a ordenadores portátiles.

A directora da Axencia Galega de Innovación, Patricia Argerey, participou este martes 4 de outubro no evento formal de ingreso dos proxectos seleccionados na Business Factory Aero, o programa de incubación, aceleración e consolidación impulsado pola dito departamento da Xunta no marco do Polo Aeroespacial de Galicia. Serán 11 iniciativas as que participarán na súa cuarta edición, a que máis propostas recibiu, un total de 88. A cita celebrouse na sede da Fundación CEL en Lugo. Haberá un itinerario de incubación (con tres prazas e orientado a empresas en fases iniciais dos seus proxectos), de aceleración (con cinco propostas e deseñado para empresas cun modelo máis evolucionado) e de consolidación (a gran novidade desta convocatoria, pensada para empresas xa asentadas que queren ir un paso máis alá nos seus proxectos e na súa presenza nos mercados, na que haberá tres proxectos).

O conselleiro de Sanidade, Julio García Comesaña, avanzou hoxe na súa comparecencia ante o pleno do Parlamento de Galicia varias medidas de impacto para simplificar os trámites entre a cidadanía e o persoal sanitario e alixeirar así a carga burocrática en atención primaria, destacando a intención de que a aplicación SergasMóbil xere alertas para o paciente no momento no que se aproxime a caducidade da súa receita e lle permita solicitar a través da propia aplicación, ou desde a oficina de farmacia, esa renovación.

O Instituto Tecnolóxico de Galicia representou nas instalacións do Centro de Investigación Aeroportada (CIAR) en Rozas, Castro de Rei (Lugo) o que sería o primeiro voo dun dron-aerotaxi en territorio español. O aparello despegou equipado coa solución tecnolóxica de xestión de tráfico aéreo urbano do ITG: a plataforma AIRUS, destinada á integración eficiente e segura de drons en vilas e cidades e froito da UMI (Unidade Mixta de Investigación) formada por ITG e NTT DATA, co apoio da Xunta (Axencia Galega de Innovación, GAIN). A demostración nas Rozas abeirouse ao proxecto europeo AMU-LED, que busca avanzar na integración segura dos vehículos aéreos non tripulados en contornas urbanas.

Para facilitar unha boa conectividade dentro do fogar temos dende hai tempo a tecnoloxía Wi-Fi mesh, que permite establecer unha rede sen fíos con varios nodos que se comunican entre eles para achegarnos en cada momento a mellor conexión posible, para o que Google ten dende hai tempo routers da familia Nest que agora dan un paso adiante co Nest Wifi Pro, que como principal vantaxe ten o soporte de Wi-Fi 6E, tipo de Wi-Fi que tamén tira proveito da banda de 6 GHz, conseguindo unhas conexións máis rápidas e estables.

Samsung anuncia a incorporación aos seus televisores da aplicación de acontra+, unha plataforma de vídeo baixo demanda que chegou a España o pasado mes de febreiro, sen conseguir grande repercusión, pero que resulta bastante curiosa pola súa proposta na que mesturan o catálogo da distribuidora de cine A Contracorriente Films (mediante subscrición e/ou aluguer) a través de streaming coa posibilidade de facerse cunha subscrición Premium que achega 1 entrada de cine ao mes (que en Galicia limítase polo momento aos naroneses Odeon Multicines).

O encontro XGN R Encounter ten xa practicamente definido o programa da súa 22ª edición, a cal terá lugar do 7 ao 9 de outubro na Feira Internacional de Galicia ABANCA. Serán máis de 50 actividades lúdicas e formativas relacionadas coa informática, as TIC e o lecer electrónico as que se desenvolvan nesta cita, que xa será no seu formato completo. Así, tras celebrase en liña en 2020 e volver facelo de forma presencial para inscritos en 2021, este ano recupera tamén a súa área de acceso libre no recinto, cuxas actividades se realizaron na pasada edición a través da Internet debido a que a pandemia aínda o esixía.

Os novos investigadores de España e Portugal que traballen en proxectos de Intelixencia Artificial, análise de información a gran escala (Big Data), computación de altas prestacións, servizos e redes intelixentes ou ciberseguridade teñen unha cita co talento esta semana no Centro de Investigación TIC da Universidade da Coruña (CITIC) da Universidade da Coruña. Será con motivo da quinta edición do Congreso XoveTIC, que se celebra este mércores 5 e este xoves 6 de outubro retomando a presencialidade tras dous anos celebrándose en liña debido á pandemia. O congreso terá lugar no CITIC, agás a sesión de pósteres na tarde do mércores, que será na Facultade de Informática da UDC coa finalidade de achegar o encontro ao alumnado.

O vindeiro 11 de outubro a Cámara de Comercio de Santiago, ao abeiro das actividades da Oficina Acelera PEME (Red.es), vai organizar a xornada sobre as cuestións da normativa vixente que temos que ter en conta á hora de afianzarnos no comercio electrónico. A xornada Aspectos legais da venda por Internet celebrarase en horario de 10.00 a 11.15 horas, na sede da Cámara no Polígono de Costa Vella.

Este 4 de outubro inaugurouse a xornada técnica Aplicacións da intelixencia artificial na análise biomecánica, unha nova iniciativa no marco da oferta formativa do ISSGA (Instituto de Seguridade e Saúde Laboral de Galicia), en formato webinario e dirixida a mostrar as oportunidades que levará consigo a aplicación na mellora da seguridade e a saúde laboral das tecnoloxías disruptivas e con capacidade para xestionar grandes cantidades de datos, comprendelos e tomar as mellores decisións. Abriu a xornada a xerente do instituto, Adela Quinzá-Torroja, quen destacou algunhas das principais potencialidades da IA no dito ámbito.

Até o momento en España ofrecían chamadas Wi-Fi operadores como Orange e Movistar, aos que agora únese Vodafone, de xeito que por fin é posible activar esta función dispoñible en moitos smartphones, que permite realizar chamadas de voz ordinarias (coas condicións da nosa tarifa actual) valéndonos da conexión á Rede a través de Wi-Fi.

A SEC (organismo estadounidense equiparable á CNMV) anunciou un acordo con Kim Kardashian por mor da súa promoción de criptoactivos, concretamente da marca EthereumMax, sen ter indicado claramente que se trataba dunha promoción pagada.